المتمرد

ندوة
 مستقبل الديمقراطية في مصر

 
السبت 6يونيو  2009
السادسة مساء
 بمركز الجيل للدراسات الشبابية
 مساكن عين الصيرة خلف بلوك 141بجوار الفرن الآلي
 

في يوم من الأيام سمعت كلمة و صدقتها و حاسس دلوقتى 

إنى غلط غلطه كبيرة و يجب ان أعتذر عنها ،

-" اهو الرجل ده يتسمع ميتقريش"

-"مين ده ؟"

-" عبد الرحمن الأبنودى"

-" معقوله !!"

-" أنت عمرك قريته ؟"

-"لا"

- "طيب انا بقولك ، انا جيبت مختارات لأشعارة بتاعت مكتبة الأسرة ،

 و معجبتنيش ولا أقولك أنا معرفتش أقراها من الأساس و أقولك

خد الكتاب ولو عرفت تقرا حاجة قوللى .... "

انا الحقيقة مصدقتش الكلام لكن نقدر نقول إن الغلطه اللى انا وقعت

فيها إن الروح السلبية اللى أتكلم بيها صديقى عن كتابات

الأبنودى فضلت متلبسانى لحد الأسبوع اللى فات لما صادفت

كتاب المختارات و انا بأعيد ترتيب المكتبة و الكتاب مطبوع

سنة 1999 يعنى نقدر نقول ان الروح السلبية دي عمرها

حوالى 8 سنين وانا عمال اروح من ديوان شعر لديوان شعر

و كل ما بقابل ديوان لعبد الرحمن الابنودى في اى مكان  

باطنش و اشوف اى حاجة تانى و معرفش ليه فتحت المختارات

و لقيت اول صفحة مكتوب عليها من

ديوان "العيال و الأرض" الحقيقه أغلب

القصائد جميلة هي بتتفاوت في مستواها لكن اغلبها ممتعه و فيها

صور شعرية رائعة ، لكن في قصيدة وصلتلها و بعديها زعلت

جدا ان انا مقريتش المختارات دى من زمان و هي قصيدة

"الخواجة لامبو مات في أسبانيا"

لقيتها" رواية في قصيدة" مليانه مشاعر جبارة و صور رهيبة

عن فنان متشرد أسمه "لامبو" و كنت متصور ان "لامبو" ده

عامل زى بوب مارلى او كان حد مشهور و فوجئت إنه شخصية

من خيال الشاعر و ده زاد إعجابى بالقصيدة .

انا آسف مره تانيه لاشعار عبد الرحمن الأبنودى و علشان كده

انا رحت امبارح اشتريت مجلد مختارات عبد الرحمن الأبنودى

الكبير إصدار مكتبة الأسرة 2006

حوالى 900 صفحة اول 200 صفحة "جوابات حراجى القط" 

انا عايش معاهم دلوقتى

و آدى  قصيدة "الخواجة لامبو مات في أسبانيا"

الأبنودى طبعا يتشاف و يتقرى و يتسمع و هو ذو

إبداع ممتع في كل الحالات.

كنت أظن ان موعدها على شاطئ البحيرة

كان معى و لكنى أكتشفت إنها انسلت بخفة

من بين راحتيا و ظلت ترقص مع الفراشات

و أنا جلست أشاهد الرقصة الملائكية 

و شعرت بقلبى يرقص معهم و لكن جسدى كان

على المقعد الرخامى البارد رغم حرارة قلبى

و دقاته السريعة ...........................

كريم الشيخ ، ناهد سمير ، إيمان زين ، أحمد الساعاتى ، مروة إبراهيم
   أحمد هندى ، أحمد دبور ، نانسي ممدوح،

  هما دول زملائى و أصدقائي المبحلقين اللى ساعدونى في عمل  أول
 فعاليه تشارك فيها بحلقة على أرض الواقع فرغم إننا مجلة إلكترونية
 تقوم بأغلب أعمالها فى العالم الإفتراضى "الانترنت" الا اننا كل موضوعاتنا
 عبارة عن بحلقه على الواقع المصرى و بالتالى كنا عايزيين نشوف بعد أكتر
من 3 شهور من انطلاقة المجلة مين عارفنا و مين ميعرفناش و اللى يعرفنا رأيه إيه فينا ؟
و إيه اللي الشباب عايزين يشوفوه علي بحلقه؟

س: طب أزاى؟
ج : شاركنا في معرض الكتب المستعمله.

كانت فكرة طرقعت فى دماغى و أنا باشوف دعوات الevents  على صفحة
 الfacebook  الخاصة بى فمن بين الدعوات كانت الدعوة لمعرض الكتب المستعملة
فى المركز الدولى للتنمية الثقافي بالدقى و في اخر الدعوة كانت هناك ملاحظة
ان الفرصة ما زالت متاحة للمشاركة في المعرض ،،، فقلت لنفسي ايه المانع
اننا كمجلة نشارك في المعرض ، إحنا حوالى 30 محرر لو 15 منهم اتبرعوا ب 5
كتب مستعمله نقدر نشارك في المعرض و نستغل الفرصة بالتواصل مع جمهورنا
و كانت اول خطوه هي سؤال المسئولين عن المركز اذا كان من الممكن ان نشارك كمجلة
في معرض الكتب المستعمله و كانت الإجابه ترحيب كبير عبرت به الكاتبه مي بهاء و هى منسقة
المعرض بالمركز و كانت الخطوة التاليه الإتصال بزملائى واحداً تلو الاخر - أتكلفت حوالى 50 جنية كروت شحن-
علشان أقولهم الفكره أغلب الزملاء فرحوا و تحمسوا للفكرة و إنهالت الافكار و المبادرات ليوم المعرض

و قسمنا الشغل ...و بدء العمل

-طباعة لوحات ملصقات.
-عمل قائمة تواصل لجمع البريد الاليكترونى لزوار المعرض للتواصل معهم.
-تصميم استطلاع رأى حول المجله لمعرفه ردود فعل الناس إتجاه المجلة .
- طباعة نماذج من الموضوعات المنشورة في المجله لاطلاع الزوار عليها.
- تحميل الموقع علي لاب توب لتعريف جمهور المعرض بالموقع .
- و طبعا التبرع بالكتب و جمعها و تصنيفها .
- الوجود يوم المعرض للتنظيم و تعريف الجمهور بالمجلة.

كل الحــــــاجات دى محدش عملها لوحده روح الجماعة كانت مسيطرة علينا و كمان
روح حب مصر و البحلقه عليها من خلال مشروع صحفى شاب و طموح.

اليوم و اللي أتعمل فيه  (:

كان اليوم ممتعا للغاية تجربة جديده ، اولا التعامل مع الجمهور بشكل مباشر و
ممارسة صحفيين شباب لبيع الكتب يعنى  مش عارف إذا كانت حصلت قبل كده
ولا  دى أول مره ، طبعا إحنا هدفنا مكنش تجارى بالمره و لكن التواصل مع الجمهور
و الإجابه على السؤال قد ايه من الشباب يعرفونا ؟
و كانت الإجابه مفاجأة فمن بين 30 أستبيان كان هناك 13 يقولون أنهم يعرفون المجلة
و أطلعوا عليها و تباينت الاراء حول المجله في الاستبيانات و على ضوء وجهات نظر
القراء هنحاول نطور نفسنا ان شاء الله ،،،، مهم جدا انى أقول ان الاستبيان تحت
شعار "رأيك بيطورنا " كانت فكرة زميلنا المبدع أحمد دبور .

اول 5 توقيعات فى دفتر أوتوجرافات بحلقة

من الحاجات الجميله اللى حصلت في يوم المعرض اننا قدرنا نجمع توقيعات
فى دفتر أوتوجرافات بحلقة و كان أول من وقع عليها هو المدون و الكاتب الشاب
ابراهيم عادل صاحب مدونة انا و انا  و كتبلنا " ابقو خلونا نكتب معاكو"
 و طبعا ابراهيم عارف انه مش محتاج عزومه
و تانى توقيع كان عبارة عن رسمه للفنان الشاب محمد تهامى
و ثالث توقيع كان للفنان مأمون المليجى و رغم ان القلم كان بيقطع كتبلنا
" مع أطيب التمنيات بالتقدم و النجاح
رابع توقيع كان للفنانه منحه زيتون اللى كانت معجبه جدا بالمجله و خصوصا
لما كنت بعرفها علي الموقع و قلت ان احنا عندنا قسم الأخبار اسمه
جاءنا البيان التالى قالت لى انا مثلت في الفيلم ده (:
و علشان كده كان توقيعها عباره عن قلب مبتسم فيه عينين بتبحلق
و اخر توقيع كان من نصيب الكاتب الشاب محمد الغزالى مؤلف ساديزم
و كتب انه لم يتابع بما يكفي للحكم لكنه سعيد برؤية شباب متحمس

طبعا دى بدايه سعيده لدفتر توقيعاتنا اللى نتمنى ان نضيف اليه المزيد
و المزيد من أصدقاء لمجلة بحلقة .

حاجات تانيه حصلت في اليوم

عملنا حوارات مع كتير من زملائنا الصحفيين و كلمناهم عن فكرة المجلة
بعنا كتب ب 55 جنيه فرحنا بيهم جدا لدرجة ان نانسي ممدوح قعدت تصور
فيهم و هى مش مصدقه نفسها رغم انها شريا هدايا لزوار المعرض بحوالى
200 جنيه مثلا :)
جمعنا ايميلات email ناس كتير أكيد هنتواصل معاهم و كانت أجمل حاجه

ان احنا عرفنا عمليا قيمة العمل الجماعى و تنسيق العمل و حب الفكرة
و التواجد وسط الشباب اللى نتمنى ان مجلة بحلقة تفضل معاهم على طول
تبحلق عليهم و هما يبحلقوا عليها .

و لازم أختم الموضوع بشكر لكل الناس اللى لولاهم مكنش هيتعمل اليوم الجميل ده
فريق عمل المركز الدولى للتنمية الثقافية و دار نون للنشر
كل زوار المعرض اللى اهتموا بالتعرف على مجلة بحلقة
كل الزملاء الصحفيين اللى اهتموا بالتعرف على المجله و فكرة مشاركتها بالمعرض
و طبعا كما كانت البداية بهم أختم بهم زملائى الاعزاء في المجله الذين لولا نشاطهم ما
استطعنا تنظيم هذه الفعالية في 3 ايام فقط .

نشر هذا الموضوع بمجلة بحلقة و للاطلاع عليه هناك كليك على البانر

اللى بيمثل لنا رمز لمعانى كتير فهو رمز لانتصار الفكره
على القمع و الرقابه والسجون و هو كمان رمز للابداع الصادق
اللى بيقاوم حتى تغير الزمن فمختلف الأجيال لحد دلوقتى
بتحب تقرا أحمد فؤاد نجم و كمان بتدور على أغانى الشيخ
إمام اللى لحن الكتير من أشعاره و هو كمان رمز للتسامح
فرغم دخوله السجن في فترة حكم الرئيس عبد الناصر
كتب قصيده "زياره لضريح عبد الناصر" اللى أعلن فيها
أن كل الجراح اللى سببتها الام هذه الفتره "طابت" ...

احنا مجله الكترونيه و عايزين نعمل حوار معاك

في البدايه حبيت أعرف عم أحمد بالمجله و احنا مين و بنعمل ايه
و فوجئت بأستقباله الحافل و برد فعله المرحب جدا بفكره الصحافه الالكترونيه
و انه معجب جدا بجيل الشباب اللى بيكتب على الانترنت سواء
على المدونات او الفيس بوك او المجلات الالكترونيه اللى زي حلاتنا
و على رغم من انه لحد دلوقتى فيه كتير من المثقفين و يمكن أجيال أقرب
لجيلنا سناً من جيل الفاجومي بتعتبر ان الصحافه الشعبيه الالكترونيه لعب
عيال انما هو كان بيكشف عن جزء مهم من اسباب حبنا ليه
و هو انه قريب مننا و متابع نشاط الشباب على الانترنت
و مؤمن بنجاحه و ده رغم انه مبيتعاملش مع النت بشكل مباشر
لكن اول كلام هو قاله كان عن رأيه في جيلنا و ده بمجرد ما عرفته
بفكره بحلقة و كان الاتى : " الجيل اللى جاى ده هيعرف ازاى ياخد حقه
و محدش هيقدر عليه لا بوليس و لا مباحث و لا مراقبه و لا اى حاجه
لانه جيل عنده وعى فهم الحدوته أحنا مين و أعدائنا مين و ده ظاهر دلوقتى
بشكل كبير شوف عدد الشباب اللى مهتمين بالسياسه من مختلف الاماكن
و بيشتغلوا في مختلف التخصصات، و خد بالك احنا لسه في أول السكه
شوف قدام هيحصل ايه ، الجيل اللى جاي ده لسه هيبدع أفكار ويكون
تنظيمات تدافع عن حقوقه اللى اتاخدت بالأونطه، الجيل اللى جاي ده
خلاص متنفعش معاه الاونطه و الأيام الجايه هتثبت كده انتو العيال بتوع
الإنترنت اللى هتطلعوا عين الحكومه و الحكومه هتطلع عينكم بس انتوا اللى هتكسبوا فى الاخر"

عن يوم تضامن طلاب معهد السينما مع غزه التاريخ بيعيد نفسه

مقدرتش أبدأ الحوار مع عم أحمد قبل ما أساله عن اللى حصل يوم حفل تضامن طلاب
معهد السينما مع غزة و خصوصا انه كان كاتب في مقاله اليومى في جريده الدستور عن اليوم و قد ايه انه كان فرحان

بطلبه معهد السينما لكن كان فيه جانب تاني لليوم وهو انه انتهى بطرد عميد المعهد للحضور ؟

هو انت فاكر ناس زى دى موجوده علشان تعلم العيال و تسيبلهم حرية الإبداع لا ، ده
علشان يكتموا علي نفسهم و يحطوا قدامهم حواجز و خطوط حمرا ميعدوهاش
و بعدين الحكايه دي بتفكرنى بمره كنت انا و الشيخ امام في كليه هندسه
جامعة عين شمس و كنا بنقول قصيده شقلبان و حد جه قاللى العميد بيقول لكم انتوا عايزين تروحوا علي
البيت و لا علي امن الدوله انا كنت فاكر اللى بيتكلم عميد مباحث و فوجئت بعد كده انه عميد الكليه.

نصر الله ، شافيز ، غزه ، صكوك بيع القطاع العام

معروف انك من محبى حسن نصر الله شوفت ازاى خطاباته الاخيره و الهوجه اللى حصلت حواليها ؟

دى أزمه مفتعله هما بيقولوا نصر الله وحش طيب أوحش من مين لو حد أحسن منه يتكلم و بعدين
هي القضية دلوقتى حسن نصر الله ولا العيال اللى بيموتوا في غزه كل الكلام ده دعايه سياسيه
علشان خاطر يتوهوا الناس و يشوهوا الصوره وبعدين انا نفسي اعرف هو نصر الله قال ايه و فين الاهانه
اللى وجها لمصر هو انت لما ابن عمك يقولك أخوك في حد بيترازل عليه روح ساعده فيها حاجه دي
فيها اى نوع من الاهانه .

حسيت بايه لما فنزويلا طردت السفير الإسرائيلى و ده محصلش في مصر او اى دوله عربيه ؟

حسيت بقوه الفكر و قيمه الحريه و ان الفكره مش بتموت احنا ممكن حد يحاول
يحبطنا و يقولنا ان اليهود معاهم الاعلام الدولى و انهم شاريين عيون العالم بفلوسهم
لكن لا الفلوس متقدرش تموت الافكار ولا الحق، يدفعوا فلوس زي ما هما عايزين
لكن شوف الحقيقه غصب عنهم تعدى المحيط و توصل فنزويلا علشان تثبت ان
الثقافة و الاشعاع الفكرى محدش يقدر عليهم .

بتقول ايه لاى حد يقول احنا عندنا ازمات و مشاكل نشوف حالنا و مالناش دعوى بغزه ولا
حتى اى حد غير نفسنا؟

ما هو ده متخطط ،إن إحنا نبقى غارقانين فى الأزمات و متكتفين علشان منعرفش نبقى أحرار
و لينا كلمتنا و بعدين هو الضرب ده هما قاصدين بيه غزه بس ما هما داخلين بعد كده على مصر
مين قال ان هما هيقفوا عند غزه و بعدين بقى ما تنساش ان غالبا ما بتنتشر اشاعات هدفها
ان احنا نطنش للقضيه الفلسطينيه زى الكذبه الكبيره اللى بتقول ان الفلسطينيين باعوا
أرضهم سنة 1948 و هما لا باعوا ارضهم ولا حاجه وخرجوا من أرضهم بقوه المجازر و السلاح
و بعدين هل معقول شعب بالكامل يبيع بلده .

ما انت عندك اهه عندنا هنا بقالهم كام سنه بيحاولوا يبيعوا فى القطاع العام بس
و مش عارفين يخلصوه يبقي ازاى الشعب الفلسطينى باع أرضه.

بمناسبه بيع القطاع العام عم أحمد فؤاد نجم هياخد الصك بتاع ملكية القطاع العام يعمل بيه ايه؟

ورقه تواليت ، همسح بيه في الحمام ، ما انا نفسي افهم هو ممكن يتعمل بيه ايه تانى ، هو الورقه
دي لو رحت بيها للبقال ممكن تجيب حاجه .

الحريه بين دلوقتى و ايام عبد الناصر

دلوقتى لما اي حد بيقول رأيه سواء كان صحفى او كاتب أو سياسي معارض
قبل ما أى حد من الموالين للحكومه بيرد عليه بيقولوا لو كان الكلام ده ايام
عبد الناصر كان زمانكم في السجن شايف ازاى الحريه بين دلوقتى و عبد الناصر؟

هو السرقه و الفساد ايام عبد الناصر كانت بالشكل اللى بيحصل دلوقتى هما دلوقتى مش من مصلحتهم
يمسكوا حد و يدخلوه السجن هما عندهم سعار أرصدتهم في جنيف و اوربا تزيد معندهمش وقت يمسكوا حد
سايبين اللى يتكلم يتكلم ، و بعدين هو يعنى إيه حريه ؟ الحريه مش بس معناها ان الشعب
يتكلم ، الحريه معناها ان الشعب يملك و يتحكم فى أدوات الإنتاج في البلد علشان
نزرع و نصنع و نعيش حياه كريمه و إن الشعب يملك إتخاذ القرار و يتعلم كويس و يعمل
مؤسسات صحيه و رياضيه كويسه ، الحريه هي كل الحاجات دى مش بس ان الشعب يتكلم
لا الحريه بجد هى ان الشعب يحكم و يتملك و يتخذ القرار

مفيش حاجه اسمها انتخابات فى 2011 الموضوع هيكون خلاف أسري

تتوقع سنه 2011 سنه إنتخابات الرئاسه شكلها هيكون عامل إزاى ؟

انتخابات ايه و فين الانتخابات دى انا شايف الموضوع عباره عن خناقه جوه الأسره
فيه توريث لجمال ولا توريث لحد غير جمال ولا مبارك هيكمل و الكواليس فيها خناقه و هيوقعوا
بعض ان شاء الله و الشعب هو اللى هيكسب بانه بعد ما يوقعوا بعض هو اللى يختار.

لو أفترضنا ان سنه 2011 هيحصل صراع علي السلطه الشعب هيحصله ايه في وسط الصراع ده ؟

ولا حاجه هقولك حاجه في كلمه مشهوره قالها مؤرخ و شاعر اسمه إبن إياس كان موجود
في مصر أيام المماليك بيقول ايه : "و حدثت مقتلة عظيمه بين المماليك البحرية و القبلية
و قتل فيها الف الف نفس "مليون" و لم تنتطح في ذاك شاتان " عادى هو ده حال مصر
يحصل اللى يحصل الحياه بتمشى كوارث الكوارث مبتوقفناش بلاش ابن اياس مش عندك
السادات مات مقتول و الناس عادي كان عندنا عيد قريب باين الناس نزلت أشترت حاجه العيد
الحياه مشيت عادى و هتمشى عادى أحنا مستعدين لاى حاجه .

انت قلت انا متبت في الدنيا و بتلكك و مش ماشى منها غير لما أشوف القضيه الفلسطينيه
بتتحل اللى حاصل في فلسطين دلوقتى بيقول إحنا قربنا ولا بنبعد عن الحل ؟

إحنا بنقرب قوى و الأمل زاد ده العدو إبتدى يفقد توازنه ، هو اللى بتعمله
إسرائيل دلوقتى ده في ناس عاقله تعمله دول مجموعه من المجانين و بيقعوا

طب والإنقسام الفلسطينى ؟

الشعب الفلسطينى ده شعب جبار مبيتلويش دراعه هما عارفين مصلحتهم فين
العالم كله بيضرب فيهم بقالهم ستين سنه عايزين يخلصوا عليهم مش عارفين
مفيش انقسام هيأثر في الفلسطينيين ، شوف المرأة الفلسطينية في أي
حته ، العاقر بتجيب 6 عيال دي اللى مش بتعرف تخلف بتجيب 6، الشعب الفلسطينى
عارف هو بيعمل ايه و هيحرر ارضه ازاى

السؤال الأخير

أخدتنا السياسه و الكلام فيها و بعدنا عن الأدب و الشعر لكن آخر سؤال هيكون
أهم الكتب اللى قريتها قبل ما تكتب شعر و حسيت انها كونت الروح الإبداعيه عندك؟

اهم الحاجات كانت من الكتب التراثيه الصفرا القديمه سيره سيف بن ذي يزن
و الزير سالم و أهمهم سيرة عنتر بن شداد ، ده بقى اول ثائر ضد العبوديه
اشترى حريته بدراعه يمكن عنتر بن شداد يكون رمز عربى مهم اثر فيا
لما تعرف ان كان فيه واحد زى ده و عربي و شاعر و فارس و ثائر على العبوديه من الاف السنين ده
أكيد كان شئ مبهر و عظيم بالنسبه ليا

نت قلت قبل كده برضه ان من اول الحاجات اللى قريتها كان شعر ابن الفارض
بس هو اكيد كان فيه استعداد او قريت حاجات قبل كده علشان خاطر تقدر
توصل لقراءه ابن الفارض الشاعر الصوفى الكبير؟

لا ولا استعداد ولا حاجه مش ابن الفارض ده ابن تسعه و انا ابن تسعه
مفيش حاجه قرايتها صعبه لو بتحب الشعر هتفهم اى شاعر عايز
يقول ايه .

خلصت الأسئله لكن الحوار ان شاء الله مش هيخلص أبدا ً بين المجله و عم أحمد
و من حبنا ليه هنحاول كل شويه نروح و نتلكك و نقعد علشان نقطف شوية بلح
من نخلة البلح الأبريمى اللى واصله للسما، المزروعه على طمي مصر
و شاربه من مية النيل فطرحت الشعر اللى احنا ما بنشبعش من قرايته ولا سماعه،
فى النهاية شكرت عم أحمد على الفرصه الجميله دى و طلبت منه طلبين و هو مشكورا

لباهم الأول كان انه يوقع علي ديوان الأعمال الكامله ليه الصادر عن دار ميرت للنشر

و كتب لى

أحمد حامد

من جيل الشياطين

شدوا حيلكم يا عيال

نجم 10 -1-2009

و هى دي صورة التوقيع

بالإضافه إلى صوره معاه و يمكن الصوره هتوضح انا كنت سعيد قد إيه ان انا عملت حوار مع الفاجومي

هذا الحوار نشر على مجلة بحلقة الإلكترونية

http://b7l2a.net/hewar/281.html

كلام عادى فى ذكرى يوم عادى 

اليوم تمر الذكرى الثالثة علي حريق مسرح قصر ثقافة

بنى سويف التى استشهد بها أكثر من 50  بين فنانين

و نقاد و مشاهدين و موظفين و هذا غير المصابين

في مكان من المفروض أن يكون مجهزا لمواجهة مثل

هذه الطوارئ ، لكن  للأسف الشديد شمعة في عرض

مسرحى سقطت على الارض فانطلقت النيران وسط

الناس لتشويهم و مر الموضوع هادئا عاديا سلساً

فقد مر العام الاول ثم الثانى و ها نحن امام الذكرى

الثالثة  ، و لا احد يعرف مصير الاسر التى فقدت عائلها

أو  هؤلاء الأبناء الذين فقدوا امهاتهم فى هذا الحريق

في الحقيقه كنت أتمنى ان اجد و أنا أبحث علي صفحات

الجرائد و الانترنت  عن تقرير صحفى يرصد وضع

هؤلاء المكلومين . كذلك يمر العام الثالث و لا نشعر

ان مصر قد استفادت اي دروس من مصائبها و كوارثها

فلم نرى محاسبات قوية  او عقوبات على مقدار الكارثة

 حتى انه كل ما حصل لرئيس هيئة قصور الثقافة وقتها

انه قدم استقالته و بعدها حصل على حكم بعشر

 سنوات سجن ثم تقريبا حصل علي براءة  و تم تتويه

الموضوع  و تمييعه لدرجة انه  يستضاف الان كاستاذ

و منظر سياسي و قيادى بالحزب الحاكم في الكثير

من البرامج التلفزيونية ، رغم ان الرجل بعد الحادث

ترك موقعه و المفروض انه تركه من أجل ان يحاسب

و بالتالى كيف يكون بريئا و كيف تكون الحادثة

بهذه البشاعة 

!!!!!!!!!!!!!!!

ما معنى المسئولية  ما معنى كلمة مسئول

اتمنى ان لا يكون مرادف هذه الكلمه ما اشاهده

في الافلام و المسلسلات المصرية

المسئولية = مقعد وثير + مكتب فاخر مطعم بالعاج + قلم

حبر مطلي بالذهب يتم به التوقيع على الأوراق التي تمررها

عليه السكرتريه بشكل روتينى + التليفون الي بيرغي فيه المسئول طول

 النهار + مكيف الهواء الذي ينزل الزخات البارده

على المسئول الذي لا يستطيع احد ان يسأله عن شئ

 سوى الله عز و جل يوم القيامه

..............

الاهم من كل ما سبق  ان عدم المحاسبه و حالة

الزهايمر التى نصاب بها تجعلنا نقع فى نفس الاخطاء

فقبل ايام من الذكرى الثالثة لمحرقة مسرح بنى سويف

حدث حريق مجلس الشورى الذى مر هادئا

عاديا ، طبيعيا  و كأن مفيش حاجة

رغم انه لو كشك جرايد اتحرق يمكن كان

تم حبس  و تغريم صاحب الكشك لانه لم يلتزم

بقوانين الامن الصناعى

ملحوظة أخيرة الحمد لله ان الذكري الثالثه لحريق

مسرح بني سويف تأتى في رمضان لكي

نستغل الفرصة و نتضرع الى الله لكي

يرحمهم و يسكنهم فسيح جناته

و يرحمنا معهم أيضا

حيث ان الرحمه تجوز على الحي و الميت

و لو اختلفت اشكال القبور