الصورة اليوتيوبية للجامعة المصرية
موقع اليوتيوب الأرشيف السينمائي و التلفزيونى الكبير ، اللى بقينا بنروح ليه لما نفتكر حته من فيلم أو أغنية قديمه نفسنا نتفرج عليها ، بنكتب عند مربع البحث اسم الفيلم أو الأغنية و ندوس enter نلاقي الي احناعايزينه غالبا فى نتائج البحث ، ده غالبا استخدمنا للموقعلكن اليو تيوب بسبب كاميرا الموبايل بقى عين ممكن نبحلق بيها على المجتمع من حولينا و ده الى انا حسيته لما كنت داخل على موقع اليوتيوب و لقيت على الصفحة الأولى لقطة بعنوان " بداية الدراسة في تجارة عين شمس"المشهد كان عبارة عن عدد كبير جدا من الولاد و البنات بيرقصوا علي أغنية شعبية طالعه من سماعات dj فى ساحة الكلية ، اكيد الدقيقة و السبعتاشر ثانية الى هما مدة المقطع بيورونا موهبه عبقرية عند الطلبة المصريين في الرقص لكن برضه المشهد ممكن يكون مستفز للمشاعر و يخلي اي حد يتفرجيسأل ليه ده بيحصل فى الجامعة؟ و هو ايه المنطقى و المظبوط الى المفروض يحصل؟و لازم تسأل اذا كان الأحتفال ببداية الدراسة كده طب هيكون ايه المستوى العلمى الى عند الطلبة دول عند احتفال التخرج ؟ ؟؟ بلف أدور على جامعة و علشان أجاوب على الاسئله دي قررت أعمل بحث بأسماء الجامعات المصرية علي اليوتيوب علشان اعرف ايه الى بيحصل جوه الجامعات دي من خلال عيون مختلفه الى هى كاميرات موبايلات الطلبة اول جامعة اخترتها "جامعة عين شمس" و كانت اغلب اللقطات بتدور حولين 1 – خناقات و أحداث بلطجة داخل الجامعة بسبب انتخابات أتحاد الطلبة و مظاهراتها.2- صدامات بين الامن و الطلبة " لقطة لاقتحام الأمن لمسجد كلية الطب".3- حفلات غنائية و رقص الطلبة داخل الجامعة " حفلات لايهاب توفيق و محمد منير و حفلات على الdj و مشاهد للطلبة بيرقصوا .4- من أغرب المشاهد مشهد لطالب بيحل امتحان مادة حقوق الانسان علي الانترنت و بيحاول يشرح لزمايله ازاى يغشوا الامتحان من موقع البحثGoogle للعلم بالشئ مادة حقوق الانسان ماده نجاح و سقوط وهي المادهالوحيدة الى ممكن الطالب يمتحنها في البيت على شبكة الانترنت.5- احتفالات الطلاب بالفوز في متشات كوره للمنتخب او النادى الاهلى. غالبا هي دي الموضوعات الي بتتكلم عنها فيديوهات جامعة عين شمس الحقيقة ملقتش اي فيديوهات عن اي حاجه ليها علاقة بالعلم او الدراسة في وسط ال85 مقطع المتوفرين لغاية دلوقتى عن الجامعة و لو كان فيه فهى هتكون حالات نادرة جدا جامعة القاهرة باعتبارهم اخوات في وطن واحد مكنش فى تقريبا اختلاف بين فيديوهات جامعة عين شمس و القاهرة واضح غير العدد فكان عدد القطات يتجاوز ال150 و الموضوعات تكاد تكون منسوخة و كان المخرج و المصور و الإضاءة هما نفسهم بيحكوا المشكلة لكن الlocation أختلف ، اول عامل مشترك كان الصدام بين الامن و الطلبة و ده بيظهر فى لقطات زى " أختطاف طالب من امام جامعة القاهرة " ، " أعتراض الامن لطلاب جامعة القاهرة من دخول المسرح" ، مظاهرات للطلبة بسبب انتخابات اتحاد الطلبة و تزويرها واسباب أخرى ، انتخابات الاتحاد الموازى ، ده جزء من الجانب السياسي للفيديوهات جانب تاني عبارة عن تكريم الفنانين و كان واضح من خلال الفيديوهات أهتمام جامعة القاهرة بتكريم مجموعة من الفنانين زى مصطفى شعبان ، وشيكو وهشام ماجد أبطال فيلم ورقة شفرة و منة شلبى و إيساف وبعد تكريم الفنانين تظهر نماذج تانية من فيديوهات بتبين احوال الجامعة زى اعتصام طلاب كلية الهندسة قسم باور فى نص شهر اكتوبر الي فات علشان توزيع المواد الاختيارية ، ده غير فيديو بعنوان "حمام سباحة في كلية إعلام " و دى لقطة لطفح مجارى حصل قدام كلية إعلام حاصر الطلبه و خلاهم مش عارفين لا يدخلوا ولا يخرجوا من الكلية ، ده غير لقطة لطالبتين بيضربوا بعض في الجامعة و الى نزلها على النت اضاف ليها أغنية "كتاب حياتى" لحسن الاسمر لاضفاؤ الكوميديا علي المشهد الدرامى و أختم عرض الأفلام بمظاهرات الشاي و الشيبسى و الى بتورينا ازاى الطلبة هجموا على الشاى و الشيبسي لما كانوا بيتوزعوا مجانا كنوع من الدعاية على الطلبة . طبعا كان فيه أفلام بتورينا حاجات ايجابية حصلت جوه الجامعة زى فطار طلبة كلية صيدلة فى رمضان او يوم تجميل و تنظيف كلية الحاسبات و المعلومات لكن برضه كل ده ملوش علاقة بالتعليم جوه الجامعة مفيش فيلم واحد بيظر مظهر للبحث العلمى أو التعليم جوه الجامعة . بقية الجامعات أبرز فيديوهات جامعة اسكندريه كانت 1 - لقطه لندوه في مراكز حقوق انسان لمواطن بيقول ان له فلوس عند الجامعة علشان هو وردلهم لحمة و فراخ و هما مدفعوش تمنها2 – فيلمين عن طالب اسمه محمد السقا أستشهد فى مظاهرة ضد أمريكا3- فيلم "الطالب المضروب بجامعة الإسكندرية يحكي للطلاب ما حدث له"4 – افلام كتيـــــــــــــــــر لفريق كورال الجامعةاما جامعة حلوان فكان ابرز فيديو عن رفض طلاب الجامعة قرار إدارة الجامعة بفصل مجموعة من الطلاب الي مدد تصل ل 3 سنوات . جامعة بنها لم تحرمنا بنها من الاعتصامات فكان فيديو أعتصام طلبة معهد عالي للتكنولوجيا أعتراضا على عدم تحويل المعهد الى كلية هندسة ، ده غير عدد بسيط من الفيديوهات كانت عبارة عن حفلات برضه زي أغلب الجامعات جامعة الزقازيق اول حاجة هاتشوفها حفلة غنائية لجيهان راتب في الجامعة والحضور كان ممتاززز و واحد من الطلبة كان هيشدها وهى بتسلم عليه من على المسرح و بعد كده فيديو لحفلة تنصيب اتحاد طلبة جامعة الزقازيق وبعديها فيديو بعنوان كلمة طلاب الأخوان لفضح الاتحاد المعين و الانتخابات المزورة و أعتصام للطلبة ضد مجلس التأديب الى أتعمل ضد .......ألخ ألخ (القصة بقت معروفة)، الفيديو التانى بعنوان "ديسكو بتجارة الزقازيق" و تقريبا كده ان الرقص على صويت الdj بقى عامل مشترك فى جامعات كتير ، و قاسم تانى مشترك هو البلطجة كتير فيديوهات بتصور بلطجية جوه الجامعة ومنها "بلطجة فى جامعة الزقازيق" ده غير الفيديوهات الى بتصور مدى الزحمة و عدم التنظيم زي مشهد " مأساة تدافع و وفاة طلاب بجامعة الزقازيق" و مشهد تانى لأغماء طالب كان واقف فى طابور الكشف الصحى ، الغش كالعادة لازم برضه يكون موجود فالامتحانات علشان كده فى لقطة صغيرة لطالب بيبرشم علي البنش الى هيمتحن عليه ، ولان الشرقاوية مشهور عنهم الكرم فكان فختام الجولة فجامعتهم هيكون بمشهدين مضحكين الاول لولد بيشحت بمناديل و بيغلس علي البنات جوه الجامعة قدام مدرج شلبى تانى مشهد و ده كان بصراحة نكته النكته لنتيجة التماس مقدمها طالب مجموعة ضعيف جدا كان عشمان يطلع ضعيف مثلا و يرفعوه نمرتين فينجح ويعدى لكن النتيجة طلعت غايب !! جامعة المنصورة الحقيقة أغلب مشاهد جامعة المنصورة شبيها جدا بحجات اتحكت قبل كده مفيش شئ مختلف او مميز يمكن غير مشاركة أعضاء هيئة تدريس جامعة المنصورة فى يوم إضراب أساتذة الجامعة يوم 23مارس الماضى من أجل تحسين أحوال الجامعة . جامعة المنوفية مفيش غير عدد محدود من اللقطات اهمها لقطة لمظاهرة للتضامن مع غزة جامعة طنطا اول فيديو هتلاقيه بعد ما تكتب اسم الجامعة في البحث 1- حريق كبير بخيمة أمتحانات فى كلية الحقوق 2- فيديو للحمامات كلية تربية رياضية و بتستخدم كغرفة تغيير ملابس مش محتاج أقول أكتر من ان الريحة واصلة من خلال الصورة 3- قصة المظاهرات و الخلافات حولين الانتخابات و الامن و الاخوان دى التيمة المشتركة بين كل الجامعات المصرية تقريبا و بالتالى كان فيه مشاهد حولين الملحمة الشعبية دى كتير كالعادة لكن الاختلاف ان كان فيه مظاهرة في جامعة طنطا ضد تصريحات وزير الثقافة حول موضوع الحجاب.4- انما اللقطة المميزة و الى ادت طعم مختلف لجامعة طنطا الحوار الى دار فى إحدى الفضائيات بين عميد كلية علوم جامعة المنصورة و احد الطلاب عنده الطالب بيقول ان العميد ضربه والعميد بيقول انه والله مضربته المشكلة بقى ان كل ده علشان الولد كان بيعمل اسبيان اذا كان زمايله موافقين على الزيادة الى حصلت فالمصاريف ولا لا .. جامعات خط الصعيد جامعة الفيوم كالعادة فى اى جامعة الصدام بين الامن و الطلاب و بيظهر في سلسلة من الفيديوهات و يبدأ ب "الاعتداء على طالب بجامعة الفيوم" ، "أعتقال 3طلاب من جامعة الفيوم" ، " مظاهرة ضد أعتقال الطلبة" لتأتى قمة الإثارة و التراجيديا في فيديو أضافه صاحب مدونة فيومى حر و بيتكلم فيها احد الطلبة عن موقف اتعرض له بعنوان "وزير التعليم العالى يهدد طالب بالاعتقال " طبعا الفيوم كانت لازم تشارك فالمهرجان الفنى الى بتقيمة كل الجامعات المصرية علشان ترفه على الطلبة بعد ما بيشوفوا الاهوال دي و ده ظهر فى لقطات لحفلات منير و حماقي فى الجامعة .و اخر أهم لقطة من جامعة الفيوم تقرير عن تسمم أصاب مئات الطلاب في المدينة الجامعية بسبب وجبه فاسدة اعدتها لهم الجامعة و فيديو تانى لمظاهرة طلابية حاشده بسبب الاهمال الى حصل . جامعة بنى سويف 1 – أعتصام طلاب الأخوان المسلمين بجامعة بنى سويف بسبب فصل طالب2-الأمن المركزى أمام جامعة بنى سويف 3- مشهد من برنامج 90 دقيقة عن طلب إحاطة حول اتهامات بلهدار مال عام فى الجامعةجامعة المنيا غير المسيرات و المظاهرات كان فيه لقطتين لحريقة في كلية الفنون الجميلة جامعة أسيوط غير المعتاد كان فيه فيديو للاحتفال باليوبيل الذهبي و فيها اغنية خمسين شمعة يا اجمل جامعة يا اغلى الجامعات . جامعة جنوب الوادى رغم بعد المسافة بين جامعة طنطا فى شمال الوادى و جامعة جنوب الوادى الا ان المشاهد الي صورها طلبة جامعة جنوب الوادى لحمام جامعتهم كانت قريبة جدا من المشاهد الى صورها زمايلهم فى طنطا و دى حاجة بتؤكد بعد 7000 سنة نجاح الملك مينا فى توحيد القطرين. ده غير دليل تانى و هو صور المظاهرات و المسيرات المعتادة و فيلم بعنوان فصل 8 طلاب بسبب اشتراكهم في مظاهرة تفتكروا الصورة اليوتيوبية ممكن تتحسن؟؟؟؟؟؟ بعد العرض الصورة الموجودة عن 13 جامعة مصرية يا ترى الصورة دى ممكن تتحسن طب تتحسن ازاى ؟ السؤال ده اجابته سهله لكن تطبيقه صعب ، الفيديوهات دى على موقع اليوتيوب و محدش هيقدر يمسحها لكن ممكن اذا كان في نية ان احنا نطور التعليم علشان البلد دى تبقى بلد متقدمه في يوم من الايام ان احنا قصاد كل فيلم سئ نحمل 100 فيلم كويس علي الموقع بيتكلم عن ابحاث مهمة خارجة من الجامعات دى او عن جوايز كبيره حصل عليها باحثين او اساتذة او طلبة في الجامعات المصرية ، افلام عن أهم الانجازات الى بتحققها كل جامعة لمصر من خلال البحث العلمى و أحنا ممكن نشوف ده فعلا لما نعمل بحث على اسماء جامعات تانية زي الموجوده في قائمة أفضل 500 جامعة حول العالم الى بتعملها جامعة شنغهاى علشان تقييم الجامعات الصينية بالنسبة لبقية الجامعات حول العالم طبعا مصر السنه دى مكنتش فيهم لكن السنه الى فاتت جامعة القاهرة كانت في ديل القائمة و مش لشئ غير حصول د . محمد البرادعى على جائزة نوبلللسلام بسبب عمله بالوكالة الدولية للطاقة الذرية و باعتباره خريج كلية الحقوق جامعة القاهرة سنة 1962 ادرجت الجامعة في القائمة. المهم ان اكتر حاجة بتستفزنا كمصريين و عرب فالقائمة مش اسماء الجامعات و المعاهد الأمريكية باعتبار ان امريكا دي امريكا ولا الاوربية لان مهما ان كان دولا برضه خواجات ولا جامعات الدول الأسياوية لان دول نمور اسياوية و احنا على قد حالنا ولا اسماء الجامعات البرازيلية على اعتبار ان البرازيل بتكسب كاس العالم و تستاهل كل خير و رغم ان المفروض ان احنا يكون عندنا غيرة وطنية من كل الدول و الشعوب دى الا اننا اكتر حاجة بتغيظنا و بتحرق دمنا وجود حوالى 6 جامعات و معاهد اسرائيلية موجودة فى هذا التقييم بصفة شبه دائمة و لأسباب تعود الى قيمة الأبحاث و المقالات العلمية المنشورة من هذه الجامعات و مستوى التعليم أكتر من الاعتماد على عامل الجوائز .علشان كدة أخترت اول جامعة اسرائيلية تقابلنى علشان ادور عليها في موقع اليوتيوب و كانت الجامعة العبرية في القدس و كانت حاصلة على المركز ال65 على مستوى العالم في التقييم و كان اول فيلم عبارة عن فيلم تسجيلى عن الجامعة بيشرح قصة تأسيس الجامعة على ارض فلسطين ايام الانتداب البريطانى و الانجازات العلمية الي هما حققوها ده غير جوايز نوبل الى اساتذة و خريجين الجامعة حصلوا عليها فى الفيزياء و الكيمياء و الاقتصاد. ده بمنتهى الامانة كنت اتمنى اشوفو فى اى جامعة مصرية ، لكن دلوقتى احنا قدمنا طريقين اما اننا نرجع لورا اكتر او نقرر نجرى لقدام لان احنا اتأخرنا بطريقة مينفعش معاها المشى لازم نجرى ملحوظة أخيرة تقييم جامعة شنغهاى ممكن اى حد يطلع عليه على موقع www.arwu.org رابط المجلة>>>>>>>
Wapher
del.icio.us
عندما أعرف من أكون سأقول لكم
