واحد راح الزمالك لقاها قافله بسبب مظاهرات الماتش المتمرد

21/11/2009 GMT 1

واحد راح الزمالك لقاها قافله بسبب مظاهرات الماتش

almotamred @ 00:31

في موضوع عن الماتش عمال يزن علي دماغي من الصبح و كنت متردد في كتابته ..لكن الحقيقه انا قررت انى اكتبه بعد ما رجعت من شويه من شارع 26 يوليو في الزمالك ، الشارع ده يعتبر من اجمل الشوارع في القاهرة يكفي انه في اوله تقع مكتبة ديوان اللى تحسسك للوهلة الاولى انها محل مجوهرات مش محل كتب من روعة و جمال طريقة عرض الكتب بالمكتبه و ينتهى باهم مؤسسه ثقافية مصريه غير حكومية الا وهي ساقية عبد المنعم الصاوى ده غير ما تحتويه الشوارع المتفرعه من مراكز ثقافيه و مكتبات علي سبيل المثال لا الحصر "مجمع اللغه العربية" ، إتحاد الكتاب" ،"دار الشروق" ،كلية الفنون الجميلة الخ ..الشارع ده النهارده كان لما مريت عليه الساعة 6 م كان وضعه كالاتى مكتبة ديوان مقفولة و مكتوب عليها لافته مكتوب عليها اعتذار لغلق المكتبه و كذلك ساقية عبد المنعم الصاوى مغلقة اللى كان المفروض ان فيها معرض لمجموعة جمعيات خيرية مصرية طوال اليوم لعرض منتجتهم و استقبال متطوعين جدد طبعا اتلغي المعرض بل و تم حصار الساقية بجنود الامن المركزى الشارع كله كان عبارة عن ثكنة عسكرية اغلب المحلات كانت مغلقه او فاتحه ابوابها علي إستحياء خوفا من حدوث اي مظاهرة مفاجأة كل ده بسبب وجود السفارة الجزائرية بالقرب من الشارع و المظاهرة العارمة اللي سهرت الشارع علي كلمتين ** *** يا جزائر

المهم يعني ان اللعيبه المصريين بعد ما خسروا في الماتش كانت من احد مبررات الهزيمه ان الجمهور الجزائرى الوحشين كانوا بيشتموا بالام قال يعنى احنا بقي جماهير الكوره عندنا مبيطلعش من بقهم العيبه ما هي دي اغلبيه جماهير الكوره في العالم ، اللعيبه حسستني ان هما بيلعبوا باليه مائي ، و مش واخدين على الأجواء دي

نتكلم عن القرف اللى حصل بعد المباراه مش هقول انه محصلش لكن

مجرد ملاحظات جانبية ، مش ملاحظين تقريبا ان نفس الكلام اللى كان بيقوله الجمهور و الصحافة الجزائرية بعد هزيمة منتخبهم هو نفسه تقريبا الكلام اللى قالته الصحافة المصرية و الجمهور المصرى بعد الهزيمة

الجزائر ادعت وجود نعوش لقتلى في القاهرة

مصر ادعت وجود نعوش لقتلى مصريين في الخرطوم

الجماهير الجزائريه قالت انها عوملت معامله سيئه في القاهرة و تعرضت للضرب

كذلك فعلت الجماهير المصرية في الخرطوم

اعلاميون جزائريون ادعوا ان الجزيرة تساند المصريين و ان نائب رئيس الجزيرة ايمن جاب الله حول الجزيرة الى قناه تساند الجمهور المصرى

كذلك قال اللإعلاميون المصريون ان الجزيرة تساند الجزائر و انهم بيكرهوا مصر علشان المؤامره الايرانيه القطريه الجزائريه بلم بلم بلا

السؤال دلوقتى هو اللى حصل ده حصل ليه ؟

اولا : العنصرية ، احنا عنصريين كتير من المصريين للاسف بيعتبروا ان بقيه العرب دول متخلفين و جهلة ،و ان مصر هي أعظم و اقوى و اذكى وكل حاجه بافعل التفضيل عن اي دولة عربية و ان الخلايجه دول بدو و بتوع بترول و السودانيين كسالى و بقية الدول شوية دول صغيره مليهاش لازمه للاسف ده واقع ولازم زي ما احنا عايزين العرب يغيروا نظرتهم لمصر احنا كمان نغير نظرتنا اتجاه العرب

اما الجزائرين فأكيد عندهم مرض مشابه ربما لثقافتهم الفرانكفونيه الله اعلم انا مش جزائري لكن اتصور ان مرض العنصريه موجود هناك بشكل من الأشكال و بالتالى كل واحد شايف ان بلده اعظم من البلد الهلفوت اللي قدامه و مش من حق الفريق المنافس انه يكسب و سلام للروح الرياضيه و تقبل الهزيمة

ثانيا : الفساد السياسي و الاقتصادي و البطالة وصلت كرة القدم انها اصبحت جزء من شرعية الحاكم فالحاكم العربي= شخص يحضر مباريات منتخب الدولة و بعض الامور الاخرى التى لا يعرفها الشعب،كرة القدم افيون الشعوب في الدول المحكومة بحكومات غير منتخبه و بالتالى فان الخسارة في مباراة كرة قدم تمثل الحرمان من الجرعه و بالتالى نستطيع ان نفسر حجم الاهتمام الذي تحصل عليه كرة القدم من ساعت بث وصفحات في الصحف و مليارات من الدعم و التمويل و الهدايا للاعبين

ثالثا : لحد دلوقتى مفيش قتلى الحمد لله هل في حد عايز قتلى من وراء التصعيد الاعلامي؟

رابعا :اغلب الصور تصور اصابات خفيفة ، كل الفنانيين اللى بيتكلموا اصدقهم ولا اكذبهم و لكن اقول الحمد لله محدش فيهم اصيب اصابه خطيرة ؟

خامسا : كرامة المصريين مسحولة داخل مصر و مدمره خارج مصر كان فين من زمان الاهتمام بكرامة المصريين و كانت فين مداخلات الفنانين و علاء مبارك و المصريين بيغرقوا و بيتحرقوا و بيتعذبوا و بيجوعوا و بيعطشوا و صخر الجبل بيطحنهم ؟؟؟ كل اللى بيحصل ده له اسباب غير فكرة كرامة المصريين ، نقدر نقول كرامة الفنانين و السياسيين و لاعبي الكورة اللى مش مصدقين ان ممكن يتحدف عليهم طوب في خناقه رغم ان فيه ناس من الشعب وقع عليهم جبل و محدش اتكلم

و أخيرا عايز أقول اسرائيل اكثر كيان ناجح حتي الان في محيطنا الجغرافي عمرهم ما وصلوا كاس العالم هل ده اثر في شرعية وجودهم مزروعين وسطنا ،

امريكا حتي وقت قريب مكنش عندها منتخب كرة قدم قوى زى اللى خرجنا بهزيمه نكراء من كاس الامم الافريقية هل ده اثر في انهم قطب العالم الاوحد يا ريتنا عمرنا ما وصلن لكاس العالم و لا كان عندنا اتحاد كوره بس كان عندنا مفعل زى مفعل ديمونا النووي و لا جامعتين من احسن 500 جامعة في العالم و لا بلاش يا ريتنا كان عندنا مواصلات امنه و لا مياه نظيفه لكل بيت لكن للاسف عندنا منتخبات كوره بيتصرف عليها ملايين و الاساسيات مش موجوده

اتمنى ان الامور تهدأ و يظهر عقلاء من الطرفين يقوموا بعمل مبادرة قوية لانهاء ما حدث بسبب مجموعة شباب محبطين من الجانبين بسبب الظروف السياسية و الاقتصادية و الاجتماعية في مصر و الجزائر و ليس امامهم غير التعصب فاختاروا الحمد لله التعصب الكروى و لم يختاروا التعصب الدينى او الطائفي لكن في النهاية هو تعصب ، و يتم تطبيع العلاقات بين مصر و الجزائر و نشوف موضوع تانى أهم نتكلم فيه

لان اللعب بمشاعر الشعوب و اثارة الحقد و الكراهية منا الممكن ان

يؤدي الى فوضي غير منظمة لا يحمد عقباها و قد تأكل في طريقها الاخضر و اليابس